ອຸຕຸເຕືອນ ເຝົ້າລະວັງສະພາບອາກາດໜາວແຕ່ນີ້ ຫາວັນທີ 25 ກຸມພານີ້
ອຸຕຸເຕືອນ ເຝົ້າລະວັງສະພາບອາກາດໜາວແຕ່ນີ້ ຫາວັນທີ 25 ກຸມພານີ້
ກົມອຸຕຸນິຍົມ ແລະ ອຸທົກກະສາດ ຄາດຄະເນສະພາບອາກາດ ໃນໄລຍະວັນທີ 21 ຫາ 27 ກຸມພາ 2022 ເຊິ່ງມີຄຳເຕືອນເພື່ອເຝົ້າລະວັງສະພາບອາກາດໜາວ ໃນໄລຍະວັນທີ 21 ຫາ 25 ກຸມພານີ້
ເນື່ອງມວນອາກາດໜາວເຢັນຈາກປະເທດຈີນຈະເພີ່ມກໍາລັງແຮງຂຶ້ນແຜ່ລົງມາປົກຄຸມຢູ່ທຸກພາກຂອງປະເທດລາວດ້ວຍກຳລັງປານກາງ ຫາ ແຮງ, ສົມທົບກັບກະແສລົມຕາເວັນອອກສ່ຽງເໜືອພັດປົກຄຸມເປັນສ່ວນໃຫ່ຍ, ເຊິ່ງຈະເຮັດໃຫ້ອາກາດເຢັນ ຫາ ໜາວເຢັນລົງ 2 ຫາ 4 ອົງສາ
ພ້ອມມີໝອກບາງປົກຫຸ້ມໃນຕອນກາງຄືນ ຫາ ຕອນເຊົ້າ ຢູ່ໃນແຕ່ລະພາກ ແລະ ອາກາດຈະໜາວເຢັນຫຼາຍ ໂດຍສະເພາະຢູ່ແຂວງພາກເໜືອ, ແຂວງໄຊສົມບູນ ແລະ ເຂດພູພຽງບໍລະເວນ ພ້ອມມີໝອກໜາປົກຫຸ້ມໃນຕອນເຊົ້າ ແລະ ຈະມີຝົນຕົກໃນລະດັບຄ່ອຍພ້ອມມີລົມພັດແຮງຢູ່ບາງທ້ອງຖິ່ນໃນແຕ່ລະພາກ.
ແຈ້ງເຕືອນເຖິງປະຊາຊົນບັນດາເຜົ່າ, ອຳນາດການປົກຄອງ ແລະ ອົງການຈັດຕັ້ງທຸກພາກສ່ວນ, ຈົ່ງມີສະຕິກຽມພ້ອມຮັບມືກັບສະພາບການປ່ຽນແປງໄວຂອງອຸນຫະພູມອາກາດໜາວເຢັນຫຼາຍ, ຊຶ່ງອາດຈະມີຜົນກະທົບຕໍ່ສຸກຂະພາບໂດຍສະເພາະແມ່ນເດັກນ້ອຍ ແລະ ຜູ້ເຖົ້າ ຂໍໃຫ້ນຸ່ງຫົ່ມໃຫ້ຮ່າງກາຍອົບອຸ່ນຢູ່ສະເໜີ.
ຈາກນັ້ນໃນໄລຍະທ້າຍອາທິດ ວັນທີ 26 ຫາ 27 ກຸມພາ 2022 ຄວາມກົດດັນສູງຂອງອາກາດເຢັນຈະອ່ອນກຳລັງລົງປົກຄຸມຢູ່ທຸກພາກຂອງປະເທດລາວ, ສົມທົບກັບລົມຕາເວັນອອກ-ຕາເວັນອອກສ່ຽງໃຕ້ພັດປົກຄຸມ
ເຊິ່ງຈະເຮັດໃຫ້ອາກາດໂດຍທົ່ວໄປຄ່ອຍອຸ່ນຂຶ້ນໃນແຕ່ລະພາກ ແລະ ຈະມີຝົນຕົກໃນລະດັບຄ່ອຍພ້ອມມີລົມພັດແຮງຢູ່ບາງທ້ອງຖິ່ນ.
