ອຸຕຸເຕືອນ !.. ແຕ່ລະແຂວງນີ້ ເຝົ້າລະວັງຝົນຕົກຟ້າຮ້ອງຟ້າເຫຼື້ອມ ໝາກເຫັບຕົກ ແລະ ລົມພັດແຮງໃນແຕ່ລະພາກ
ອຸຕຸເຕືອນ 13-16 ເມສານີ້ ເຝົ້າລະວັງຝົນຕົກຟ້າຮ້ອງຟ້າເຫຼື້ອມ ໝາກເຫັບຕົກ ແລະ ລົມພັດແຮງໃນແຕ່ລະພາກ
ກົມອຸຕຸນິຍົມ ແລະອຸທົກກະສາດ ຄາດຄະເນສະພາບອາກາດ ໃນໄລຍະວັນທີ 10 ຫາ 16 ເມສາ 2023 ວ່າ:
ໃນໄລຍະວັນທີ 10 ຫາ 12 ເມສານີ້ ຄວາມກົດດັນສູງຂອງອາກາດເຢັນ ຍັງປົກຄຸມຢູ່ເຂດພາກເໜືອດ້ານ
ຕາເວັນອອກຂອງປະເທດລາວດ້ວຍກຳລັງອ່ອນ, ສ່ວນແຂວງພາກເໜືອດ້ານຕາເວັນຕົກ ລົງຫາ ພາກກາງ ແລະ ພາກໃຕ້ ປົກຄຸມດ້ວຍຄວາມກົດດັນຕໍ່າຂອງອາກາດຮ້ອນ ສົມທົບກັບລົມຕາເວັນຕົກພັດປົກຄຸມ ຊື່ງຈະເຮັດໃຫ້ອາກາດຈະຮ້ອນ ຫາຮ້ອນເອົ້າ,
ຈະມີຝົນຕົກຟ້າຮ້ອງໃນລະດັບຄ່ອຍຢູ່ໃນແຕ່ລະພາກ ແລະ ຈະມີລົມພັດແຮງຢູ່ບາງທ້ອງຖິ່ນ.
ຈາກນັ້ນໃນໄລຍະທ້າຍອາທິດແຕ່ວັນທີ 13 ຫາ 16 ເມສາ 2023 ຄວາມກົດດັນຕໍ່າຂອງອາກາດຮ້ອນຈະປົກຄຸມຢູ່ທົ່ວທຸກພາກຂອງປະເທດລາວ ດ້ວຍກໍາລັງປານກາງ ສົມທົບກັບກະແສລົມຕາເວັນຕົກພັດປົກຄຸມພາກເໜືອ ຫາ ພາກກາງ ແລະ ກະແສລົມຕາເວັນອອກສ່ຽງໃຕ້ປົກຄຸມ,
ຊື່ງຈະເຮັດໃຫ້ອາກາດຮ້ອນ ຫາ ຮ້ອນເອົ້າ ພ້ອມມີໝອກແຫ້ງປົກຫຸ້ມຢູ່ທົ່ວໄປ ແລະ ຈະມີຝົນຕົກຟ້າຮ້ອງຟ້າເຫຼື້ອມ ແລະ ໝາກເຫັບຕົກ ພ້ອມມີລົມພັດແຮງຢູ່ບາງທ້ອງຖີ່ນໃນແຕ່ລະພາກ ໂດຍສະເພາະໃນໄລຍະຕອນບ່າຍຫາຄໍ່າ.
ດັ່ງນັ້ນ ຈຶ່ງຂໍແຈ້ງເຕືອນເຖິງປະຊາຊົນ ແລະ ອໍານາດການປົກຄອງທຸກພາກສ່ວນ ຈົ່ງມີສະຕິລະມັດລະວັງ ຕໍ່ສະພາບອາກາດຮ້າຍແຮງດັ່ງກ່າວ ທີ່ອາດຈະເກີດຂຶ້ນໄດ້ ໂດຍສະເພາະສະພາບລົມແຮງ,
ຟ້າເຫຼື້ອມຟ່າຜ່າ ແລະ ໝາກເຫັບຕົກ ທີ່ຈະສົ່ງຜົນກະທົບຕໍ່ຊີວິດ ແລະ ຊັບສິນທີ່ມີຄ່າຂອງທ່ານ.