ຫົວໜ້າຕຳຫຼວດຈະລາຈອນຢືນຢັນ ວ່າການຕັ້ງດ່ານກວດມີເປົ້າໝາຍເພື່ອການປ້ອງກັນຄວາມສະຫງົບ
ພັນເອກ ກົງສີ ສຸວັນນະຕຸ້ມ ຫົວໜ້າກົມຕຳຫຼວດຈະລາຈອນ ກະຊວງປ້ອງກັນຄວາມສະຫງົບໄດ້ໃຫ້ການຢືນຢັນວ່າການຕັ້ງດ່ານກວດຂອງຕຳຫຼວດຈະລາຈອນມີເປົ້າໝາຍເພື່ອການປ້ອງກັນຄວາມສະຫງົບໃນສັງຄົມລາວເປັນສຳຄັນ ຊຶ່ງຕົງກັນຂ້າມກັບຫາງສຽງໃນສັງຄົມລາວທີ່ມອງວ່າ
ການຕັ້ງດ່ານກວດຂອງຕຳຫຼວດຈະລາຈອນມີເປົ້າໝາຍເພື່ອປັບໄໝ ແລະ ຮຽກຮັບເອົາເງິນຈາກປະຊາຊົນເປັນດ້ານຫຼັກຈຶ່ງເປັນການເຂົ້າໃຈທີ່ຄາດເຄື່ອນຈາກການຈັດຕັ້ງປະຕິບັດຕົວຈິງທີ່ຕຳຫຼວດຈະລາຈອນທຸກຄົນຈະຕ້ອງປະຕິບັດຕາມກົດໝາຍ ແລະ
ຈະບໍ່ມີການປັບໄໝຢ່າງເດັດຂາດ ຖ້າຫາກວ່າປະຊາຊົນທີ່ຂັບຂີ່ຍານພາຫະນະບໍ່ໄດ້ກະທຳຄວາມຜິດໃດຫຼືຫຼີກລ່ຽງການກະທຳໃດຕາມກົດໝາຍຈະລາຈອນນັ້ນ ດັ່ງທີ່ພັນເອກ ກົງສີ ໄດ້ໃຫ້ການຢືນຢັນວ່າ
ສັງຄົມລາວເຮົານີ້ກະມີຂຶ້ນມາເລື້ອຍໆວ່າເຈົ້າໜ້າທີ່ຕຳຫຼວດຈະລາຈອນໄປຕັ້ງດ່ານເພື່ອຫາເງິນຫາຄຳ ອັນນັ້ນເປັນການເຂົ້າໃນທີ່ບໍ່ຖືກຕ້ອງບໍ່ຖືກຕ້ອງບ່ອນໃດການທີ່ໄປເວົ້ານັ້ນຄົນຜູ້ທີ່ເວົ້າກະບໍ່ໄດ້ສະແດງຕົນໂຕທີ່ຖືກຕ້ອງຕາມຈຸດເພິ່ນໃຫ້ເວົ້າ ຢາກຕຳໜິສົ່ງຂ່າວຕໍ່ຕຳຫຼວດຈະລາຈອນ
ກໍເຂົ້າມາຫາຫົວໜ້າກົມຕຳຫຼວດຈະລາຈອນໄດ້ ບໍ່ມີດອກເຂົາສິໄໝເອົາເງິນເອົາຄຳແນວບໍ່ຖືກຕ້ອງເນາະ ຖ້າເຮົາຄົບໝົດ ໃບຖະບຽນກໍ່ມີ ໃບຂັບຂີ່ກໍຄືກັນ ປະກັນໄພກະຍັງຄົງຢູ່ຕຳຫຼວດຈະລາຈອນບໍ່ສາມາດໄໝທ່ານໄດ້ຢ່າງເດັດຂາດ ຄັນໄໝນັ້ນມັນມີດຳລັດການປັບໄໝເປັນບ່ອນອີກຄັກແນ່ໃດ.
ກ່ອນໜ້ານີ້ ທ່ານທອງລຸນ ສີສຸລິດ ປະທານປະເທດລາວຖະແຫຼງຢືນຢັນຕໍ່ກອງປະຊຸມວຽກງານພັກ, ວຽກງານພະນັກງານທົ່ວກອງກຳລັງປ້ອງກັນຄວາມສະຫງົບແຫ່ງຊາດຄັ້ງທີ 5 ວ່ານອກຈາກການປ້ອງກັນ ແລະ ປາບປາມອາຊະຍາກຳທີ່ເປັນໄພຄຸກຄາມຕໍ່ສະຖຽນລະພາບທາງການເມືອງ ແລະ ຄວາມໝັ້ນຄົງແຫ່ງຊາດແລ້ວ
ການເສີມສ້າງຄວາມເຊື່ອໝັ້ນ ແລະ ສັດທາຂອງປະຊາຊົນ ລາວ ໃຫ້ມີຕໍ່ກອງກຳລັງປ້ອງກັນຄວາມສະຫງົບຢ່າງແທ້ຈິງນັ້ນກໍແມ່ນພາລະກິດສຳຄັນທີ່ພະນັກງານປ້ອງກັນຄວາມສະຫງົບຫຼືຕຳຫຼວດທຸກຄົນຕ້ອງຈັດຕັ້ງປະຕິບັດໃຫ້ໄດ້ຢ່າງເປັນຮູບປະທຳດ້ວຍການຍຶດໝັ້ນໃນພາລະກິດຮັກສາຄວາມປອດໄພໃຫ້ແກ່ປະຊາຊົນລາວບັນດາເຜົ່າໃນທົ່ວປະເທດ ທັງຍັງຈະຕ້ອງປະຕິບັດໜ້າທີ່ຢ່າງເປັນມິດໂດຍສຸດຈະລິດ ແລະ ບໍ່ຮັບເອົາສິນບົນອີກດ້ວຍ.
ສ່ວນທ່ານ ຄຳພັນ ພົມມະທັດ ປະທານຄະນະກວດກາສູນກາງພັກປະຊາຊົນປະຕິວັດລາວ ກໍໃຫ້ການຢືນຢັນວ່າເປົ້າໝາຍການກວດກາພັກ-ລັດໃນປັດຈຸບັນໄດ້ແນໃສ່ການກວດກາການຈັດຕັ້ງປະຕິບັດໃນບັນດາໂຄງການພັດທະນາທີ່ລົງທຶນໂດຍລັດຖະບານລາວເປັນຫຼັກ
ເພາະວ່າເປັນພາກສ່ວນທີ່ມີການຮົ່ວໄຫຼ ແລະ ເກີດການສູນເສຍດ້ານງົບປະມານຂອງລັດຖະບານຫຼາຍທີ່ສຸດໃນໄລຍະຜ່ານມາທີ່ມີສາເຫດສຳຄັນມາຈາກການປະຕິບັດໜ້າທີ່ໂດຍທຸຈະລິດຂອງບັນດາພະນັກງານຂອງພັກ-ລັດ
ດັ່ງນັ້ນເພື່ອເປັນການສະກັດກັ້ນ ແລະ ປາບປາມການກະທຳດັ່ງກ່າວນີ້ຈຶ່ງຕ້ອງເພີ່ມມາດຕະການເຂັ້ມງວດຫຼາຍຂຶ້ນເຂົ້າໃນພາກກວດກາການປະຕິບັດໜ້າທີ່ ແລະ ບັນຊີຊັບສິນຂອງພະນັກງານພັກ-ລັດທີ່ມີລວມເຖິງຕຳຫຼວດ ແລະ ທະຫານດ້ວຍ.
ໂດຍໃນໄລຍະ 5 ປີທີ່ຜ່ານມາກໍໄດ້ກວດພົບການທຸຈະລິດທີ່ເປັນການຮ່ວມມືລະຫວ່າງສະມາຊິກພັກກັບບຸກຄົນພາຍນອກເຖິງ 749 ຄົນທີ່ເຮັດໃຫ້ເກີດການເສຍຫາຍຫຼາຍກວ່າ 746 ຕື້ກີບກັບ 362 ກວ່າລ້ານບາດ ແລະ 14 ລ້ານໂດລາໃນນີ້ສາມາດເກັບຄືນມາໄດ້ 391 ກວ່າຕື້ກີບກັບ 25 ກວ່າລ້ານບາດ ແລະ 10,000 ໂດລາ
ທັງຍັງໄດ້ດຳເນີນການກວດກາພາຍໃນພັກ ແລະ ລົງໂທດທາງວິໄນຕໍ່ສະມາຊິກພັກ 3,200 ກວ່າຄົນທີ່ພົວພັນກັບການທຸຈະລິດ ແລະ ໃຊ້ອຳນາດໜ້າທີ່ເພື່ອຫາຜົນປະໂຫຍດໃຫ້ຕົນເອງ
ໃນນີ້ລວມເຖິງ 473 ຄົນທີ່ຖືກລົງໂທດທາງວິໄນ ແລະ 71 ຄົນຖືກຂັງຄຸກຈາກການທຸຈະລິດໃນ 191 ໂຄງການທີ່ເຮັດໃຫ້ເສຍຫາຍກວ່າ 498 ຕື້ກີບກັບ 395,554 ບາດ ແລະ 1 ລ້ານໂດລາ ແຕ່ສາມາດເກັບຄືນມາໄດ້ພຽງ 244 ຕື້ກີບກັບ 4 ໝື່ນໂດລາເທົ່ານັ້ນ.